Psalms 139

¹ Declaring of thi wordis liytneth; and yyueth vnderstonding to meke men. ² I openede my mouth, and drouy the spirit; for Y desiride thi comaundementis. ³ Biholde thou on me, and haue merci on me; bi the dom of hem that louen thi name. ⁴ Dresse thou my goyingis bi thi speche; that al vnriytfulnesse haue not lordschip on me. ⁵ Ayeyn bie thou me fro the false chalengis of men; that Y kepe thin heestis. ⁶ Liytne thi face on thi seruaunt; and teche thou me thi iustifiyngis. ⁷ Myn iyen ledden forth the outgoynges of watris; for thei kepten not thi lawe. ⁸ Lord, thou art iust; and thi dom is riytful. ⁹ Thou hast comaundid riytfulnesse, thi witnessingis; and thi treuthe greetli to be kept. ¹⁰ Mi feruent loue made me to be meltid; for myn enemys foryaten thi wordis. ¹¹ Thi speche is greetli enflawmed; and thi seruaunt louede it. ¹² I am yong, and dispisid; Y foryat not thi iustifiyngis. ¹³ Lord, thi riytfulnesse is riytfulnesse with outen ende; and thi lawe is treuthe. ¹⁴ Tribulacioun and angwische founden me; thin heestis is my thenking. ¹⁵ Thi witnessyngis is equite with outen ende; yyue thou vndirstondyng to me, and Y schal lyue. ¹⁶ I criede in al myn herte, Lord, here thou me; and Y schal seke thi iustifiyngis. ¹⁷ I criede to thee, make thou me saaf; that Y kepe thi comaundementis. ¹⁸ I bifor cam in ripenesse, and Y criede; Y hopide aboue on thi wordis. ¹⁹ Myn iyen bifor camen to thee ful eerli; that Y schulde bithenke thi speches. ²⁰ Lord, here thou my vois bi thi merci; and quykene thou me bi thi doom. ²¹ Thei that pursuen me neiyden to wickidnesse; forsothe thei ben maad fer fro thi lawe. ²² Lord, thou art nyy; and alle thi weies ben treuthe. ²³ In the bigynnyng Y knewe of thi witnessingis; for thou hast foundid tho with outen ende. ²⁴ Se thou my mekenesse, and delyuere thou me; for Y foryat not thi lawe.