Psalms 140

¹ Heelthe is fer fro synners; for thei souyten not thi iustifiyngis. ² Lord, thi mercies ben manye; quykene thou me bi thi dom. ³ Thei ben manye that pursuen me, and doen tribulacioun to me; Y bowide not awei fro thi witnessingis. ⁴ I siy brekers of the lawe, and Y was meltid; for thei kepten not thi spechis. ⁵ Lord, se thou, for Y louede thi comaundementis; quikene thou me in thi merci. ⁶ The bigynnyng of thi wordis is treuthe; alle the domes of thi riytwisnesse ben withouten ende. ⁷ Princes pursueden me with outen cause; and my herte dredde of thi wordis. ⁸ I schal be glad on thi spechis; as he that fyndith many spuylis. ⁹ I hatide and wlatide wickidnesse; forsothe Y louede thi lawe. ¹⁰ I seide heriyngis to thee seuene sithis in the dai; on the domes of thi riytfulnesse. ¹¹ Miche pees is to hem that louen thi lawe; and no sclaundir is to hem. ¹² Lord, Y abood thin heelthe; and Y louede thin heestis. ¹³ Mi soule kepte thi witnessyngis; and louede tho greetli.