Psalms 19

¹ If ye ben `not conuertid, he schal florische his swerd; he hath bent his bouwe, and made it redi. ² And therynne he hath maad redi the vessels of deth; he hath fulli maad his arewis with brennynge thingis. ³ Lo! he conseyuede sorewe; he peynfuli brouyte forth vnriytfulnesse, and childide wickidnesse. ⁴ He openide a lake, and diggide it out; and he felde in to the dich which he made. ⁵ His sorewe schal be turned in to his heed; and his wickidnesse schal come doun in to his necke. ⁶ I schal knouleche to the Lord bi his riytfulnesse; and Y schal synge to the name of the hiyeste Lord. ⁸ The title of the eiythe salm. To the ouercomere, for pressours, the salm of Dauid. ⁹ Lord, thou art oure Lord; thi name is ful wonderful in al erthe. For thi greet doyng is reisid, aboue heuenes. ¹⁰ Of the mouth of yonge children, not spekynge and soukynge mylk, thou madist perfitli heriyng, for thin enemyes; that thou destrie the enemy and avengere. ¹¹ For Y schal se thin heuenes, the werkis of thi fyngris; the moone and sterris, whiche thou hast foundid. ¹² What is a man, that thou art myndeful of hym; ethir the sone of a virgyn, for thou visitist hym? ¹³ Thou hast maad hym a litil lesse than aungels; thou hast corouned hym with glorie and onour, ¹⁴ and hast ordeyned hym aboue the werkis of thin hondis.