Psalms 26

¹ Thou hast preued myn herte, and hast visitid in niyt; thou hast examynyd me bi fier, and wickidnesse is not foundun in me. ² That my mouth speke not the werkis of men; for the wordis of thi lippis Y haue kept harde weies. ³ Make thou perfit my goyngis in thi pathis; that my steppis be not moued. ⁴ I criede, for thou, God, herdist me; bowe doun thin eere to me, and here thou my wordis. ⁵ Make wondurful thi mercies; that makist saaf men hopynge in thee. 6 Kepe thou me as the appil of the iye; fro men ayenstondynge thi riyt hond. Keuere thou me vndur the schadewe of thi wyngis; ⁷ fro the face of vnpitouse men, that han turmentid me. Myn enemyes han cumpassid my soule; ⁸ thei han closide togidere her fatnesse; the mouth of hem spak pride. ⁹ Thei castiden me forth, and han cumpassid me now; thei ordeyneden to bowe doun her iyen in to erthe. ¹⁰ Thei, as a lioun maad redi to prey, han take me; and as the whelp of a lioun dwellynge in hid places. ¹¹ Lord, rise thou vp, bifor come thou hym, and disseyue thou hym; delyuere thou my lijf fro the vnpitouse, 12 delyuere thou thi swerd fro the enemyes of thin hond. Lord, departe thou hem fro a fewe men of the lond in the lijf of hem; her wombe is fillid of thin hid thingis. Thei ben fillid with sones; and thei leften her relifis to her litle children.