Psalms 27

² The title of the seuenetenthe salm. To victorie, the word of the Lord to Dauid; which spak the wordis of this song, in the dai in which the Lord delyuerede hym fro the hond of alle hise enemyes, and fro the hond of Saul; and he seide: ³ Lord, my strengthe, Y schal loue thee; the Lord is my stidfastnesse, and my refuyt, and mi deliuerere. ⁴ Mi God is myn helpere; and Y schal hope in to hym. My defendere, and the horn of myn helthe; and myn vptakere. ⁵ I schal preise, and ynwardli clepe the Lord; and Y schal be saaf fro myn enemyes. ⁶ The sorewis of deth cumpassiden me; and the strondis of wickidnesse disturbliden me. ⁷ The sorewis of helle cumpassiden me; the snaris of deeth bifor ocupieden me. 8 In my tribulacioun Y inwardli clepide the Lord; and Y criede to my God. And he herde my vois fro his hooli temple; and my cry in his siyt entride in to hise eeris. 9 The erthe was mouede togidere, and tremblede togidere; the foundementis of hillis weren troblid togidere, and weren moued togidere; for he was wrooth to hem. 10 Smoke stiede in the ire of hym, and fier brente out fro his face; coolis weren kyndlid of hym. 11 He bowide doun heuenes, and cam doun; and derknesse was vndur hise feet. 12 And he stiede on cherubym, and flei; he fley ouer the pennes of wyndis. 13 And he settide derknesses his hidyng place, his tabernacle in his cumpas; derk water was in the cloudes of the lowere eir. ¹⁴ Ful cleer cloudis passiden in his siyt; hail and the coolis of fier.