Psalms 39

¹ Thou hatist hem that kepen vanytees superfluli. ² Forsothe Y hopide in the Lord; Y schal haue fulli ioie, and schal be glad in thi merci. For thou byheldist my mekenesse; thou sauedist my lijf fro nedis. ³ And thou closidist not me togidere withynne the hondis of the enemy; thou hast sett my feet in a large place. ⁴ Lord, haue thou merci on me, for Y am troblid; myn iye is troblid in ire, my soule and my wombe `ben troblid. ⁵ For whi my lijf failide in sorewe; and my yeeris in weilynges. Mi vertu is maad feble in pouert; and my boonys ben disturblid. ⁶ Ouer alle myn enemyes Y am maad schenship greetli to my neiyboris; and drede to my knowun. Thei that sien me with outforth, fledden fro me; Y am youun to foryetyng, ⁷ as a deed man fro herte. I am maad as a lorun vessel; ⁸ for Y herde dispisyng of many men dwellynge in cumpas. In that thing the while thei camen togidere ayens me; thei counceliden to take my lijf. ⁹ But, Lord, Y hopide in thee; Y seide, Thou art my God; my tymes ben in thin hondis. ¹⁰ Delyuer thou me fro the hondis of mynen enemyes; and fro hem that pursuen me. ¹¹ Make thou cleer thi face on thi seruaunt; Lord, make thou me saaf in thi merci; ¹² be Y not schent, for Y inwardli clepide thee. Unpitouse men be aschamed, and be led forth in to helle; ¹³ gileful lippys be maad doumbe. That speken wickidnesse ayens a iust man; in pride, and in mysusyng.