Psalms 40

¹ Thou schalt hide hem in the priuyte of thi face; fro disturblyng of men. Thou schalt defende hem in thi tabernacle; fro ayenseiyng of tungis. ² Blessid be the Lord; for he hath maad wondurful his merci to me in a strengthid citee. ³ Forsothe Y seide in the passyng of my soule; Y am cast out fro the face of thin iyen. Therfor thou herdist the vois of my preier; while Y criede to thee. ⁴ Alle ye hooli men of the Lord, loue hym; for the Lord schal seke treuthe, and he schal yelde plenteuousli to hem that doen pride. ⁵ Alle ye that hopen in the Lord, do manli; and youre herte be coumfortid. ⁷ The title of the oon and thrittithe salm. Lernyng to Dauid. Blessid ben thei, whose wickidnessis ben foryouun; and whose synnes ben hilid. ⁸ Blessid is the man, to whom the Lord arrettide not synne; nethir gile is in his spirit. ⁹ For Y was stille, my boonys wexiden elde; while Y criede al dai. ¹⁰ For bi dai and nyyt thin `hond was maad greuouse on me; Y am turned in my wretchednesse, while the thorn is set in. ¹¹ I made my synne knowun to thee; and Y hidde not my vnriytfulnesse. I seide, Y schal knouleche ayens me myn vnriytfulnesse to the Lord; and thou hast foryoue the wickidnesse of my synne. ¹² For this thing ech hooli man schal preye to thee; in couenable tyme. Netheles in the greet flood of many watris; tho schulen not neiye to thee. ¹³ Thou art my refuyt fro tribulacioun, that cumpasside me; thou, my fulli ioiyng, delyuere me fro hem that cumpassen me. ¹⁴ Y schal yyue vnderstondyng to thee, and Y schal teche thee; in this weie in which thou schalt go, Y schal make stidefast myn iyen on thee. ¹⁵ Nile ye be maad as an hors and mule; to whiche is noon vndurstondyng. Lord, constreyne thou the chekis of hem with a bernacle and bridil; that neiyen not to thee. ¹⁶ Many betyngis ben of the synnere; but merci schal cumpasse hym that hopith in the Lord. ¹⁷ Ye iust men, be glad, and make fulli ioie in the Lord; and alle ye riytful of herte, haue glorie.