Psalms 48

¹ And yit a litil, and a synnere schal not be; and thou schalt seke his place, and schalt not fynde. ² But mylde men schulen enerite the lond; and schulen delite in the multitude of pees. ³ A synnere schal aspie a riytful man; and he schal gnaste with hise teeth on hym. ⁴ But the Lord schal scorne the synnere; for he biholdith that his day cometh. ⁵ Synners drowen out swerd; thei benten her bouwe. To disseyue a pore man and nedi; to strangle riytful men of herte. ⁶ Her swerd entre in to the herte of hem silf; and her bouwe be brokun. ⁷ Betere is a litil thing to a iust man; than many richessis of synneris. ⁸ For the armes of synneris schal be al to-brokun; but the Lord confermeth iust men. ⁹ The Lord knowith the daies of vnwemmed; and her heritage schal be withouten ende. ¹⁰ Thei schulen not be schent in the yuel tyme, and thei schulen be fillid in the dayes of hungur; ¹¹ for synneris schulen perische. Forsothe anoon as the enemyes of the Lord ben onourid, and enhaunsid; thei failynge schulen faile as smoke. ¹² A synnere schal borewe, and schal not paie; but a iust man hath merci, and schal yyue. ¹³ For thei that blessen the Lord schulen enerite the lond; but thei that cursen hym schulen perische. ¹⁴ The goyng of a man schal be dressid anentis the Lord; and he schal wilne his weie.