Psalms 50

¹ For my wickidnessis ben goon ouer myn heed; as an heuy birthun, tho ben maad heuy on me. ² Myn heelid woundis weren rotun, and ben brokun; fro the face of myn vnwisdom. ³ I am maad a wretche, and Y am bowid doun til in to the ende; al dai Y entride sorewful. ⁴ For my leendis ben fillid with scornyngis; and helthe is not in my fleisch. ⁵ I am turmentid, and maad low ful greetli; Y roride for the weilyng of myn herte. ⁶ Lord, al my desire is bifor thee; and my weilyng is not hid fro thee. ⁷ Myn herte is disturblid in me, my vertu forsook me; and the liyt of myn iyen `forsook me, and it is not with me. ⁸ My frendis and my neiyboris neiyiden; and stoden ayens me. And thei that weren bisidis me stoden afer; ⁹ and thei diden violence, that souyten my lijf. And thei that souyten yuels to me, spaken vanytees; and thouyten gilis al dai. ¹⁰ But Y as a deef man herde not; and as a doumb man not openynge his mouth. ¹¹ And Y am maad as a man not herynge; and not hauynge repreuyngis in his mouth. ¹² For, Lord, Y hopide in thee; my Lord God, thou schalt here me. ¹³ For Y seide, Lest ony tyme myn enemyes haue ioye on me; and the while my feet ben mouyd, thei spaken grete thingis on me. ¹⁴ For Y am redi to betyngis; and my sorewe is euere in my siyt. ¹⁵ For Y schal telle my wickidnesse; and Y schal thenke for my synne. ¹⁶ But myn enemyes lyuen, and ben confermed on me; and thei ben multiplyed, that haten me wickidli. ¹⁷ Thei that yelden yuels for goodis, backbitiden me; for Y suede goodnesse. ¹⁸ My Lord God, forsake thou not me; go thou not awei fro me. ¹⁹ Lord God of myn helthe; biholde thou in to myn help. ²¹ The title of the eiyte and threttithe salm. For victorie, to Iditum, the song of Dauid. ²² I seide, Y schal kepe my weies; that Y trespasse not in my tunge. I settide kepyng to my mouth; whanne a synnere stood ayens me. ²³ I was doumb, and was mekid ful gretli, and was stille fro goodis; and my sorewe was renulid.