Psalms 56

¹ Thou art thi silf, my kyng and my God; that sendist helthis to Jacob. ² Bi thee we schulen wyndewe oure enemyes with horn; and in thi name we schulen dispise hem, that risen ayen vs. ³ For Y schal not hope in my bouwe; and my swerd schal not saue me. ⁴ For thou hast saued vs fro men turmentinge vs; and thou hast schent men hatinge vs. ⁵ We schulen be preisid in God al dai; and in thi name we schulen knouleche to thee in to the world. ⁶ But now thou hast put vs abac, and hast schent vs; and thou, God, schalt not go out in oure vertues. ⁷ Thou hast turned vs awei bihynde aftir oure enemyes; and thei, that hatiden vs, rauyschiden dyuerseli to hem silf. ⁸ Thou hast youe vs as scheep of meetis; and among hethene men thou hast scaterid vs. ⁹ Thou hast seeld thi puple with out prijs; and multitude was not in the chaungyngis of hem. ¹⁰ Thou hast set vs schenschip to oure neiyboris; mouwyng and scorn to hem that ben in oure cumpas. ¹¹ Thou hast set vs into licnesse to hethene me; stiryng of heed among puplis. ¹² Al dai my schame is ayens me; and the schenschipe of my face hilide me. ¹³ Fro the vois of dispisere, and yuele spekere; fro the face of enemy, and pursuere.