Psalms 59

¹ Thei schulen be brouyt in gladnesse, and ful out ioiyng; thei schulen be brouyt in to the temple of the kyng. ² Sones ben borun to thee, for thi fadris; thou schalt ordeyne hem princes on al erthe. ³ Lord, thei schulen be myndeful of thi name; in ech generacioun, and in to generacioun. Therfor puplis schulen knouleche to thee withouten ende; and in to the world of world. ⁵ The title of the five and fourtithe salm. To the ouercomere, the song of the sones of Chore, for yongthis. ⁶ Oure God, thou art refuyt, and vertu; helpere in tribulacions, that han founde vs greetly. ⁷ Therfor we schulen not drede, while the erthe schal be troblid; and the hillis schulen be borun ouer in to the herte of the see. ⁸ The watris of hem sowneden, and weren troblid; hillis weren troblid togidere in the strengthe of hym. ⁹ The feersnesse of flood makith glad the citee of God; the hiyeste God hath halewid his tabernacle. ¹⁰ God in the myddis therof schal not be moued; God schal helpe it eerli in the grey morewtid. ¹¹ Hethene men weren disturblid togidere, and rewmes weren bowid doun; God yaf his vois, the erthe was moued. ¹² The Lord of vertues is with vs; God of Jacob is oure vptakere. ¹³ Come ye, and se the werkis of the Lord; whiche wondris he hath set on the erthe. ¹⁴ He doynge awei batels til to the ende of the lond; schal al to-brese bouwe, and schal breke togidere armuris, and schal brenne scheldis bi fier. ¹⁵ Yyue ye tent, and se ye, that Y am God; Y schal be enhaunsid among hethene men; and Y schal be enhaunsid in erthe. ¹⁶ The Lord of vertues is with vs; God of Jacob is oure vptakere.