Psalms 64

² The title of the nyne and fourtithe salm. The salm of Asaph. God, the Lord of goddis, spak; and clepide the erthe, ³ fro the risynge of the sunne til to the goyng doun. The schap of his fairnesse fro Syon, ⁴ God schal come opynli; oure God, and he schal not be stille. Fier schal brenne an hiye in his siyt; and a strong tempest in his cumpas. ⁵ He clepide heuene aboue; and the erthe, to deme his puple. ⁶ Gadere ye to hym hise seyntis; that ordeynen his testament aboue sacrifices. ⁷ `And heuenes schulen schewe his riytfulnesse; for God is the iuge. ⁸ Mi puple, here thou, and Y schal speke to Israel; and Y schal witnesse to thee, Y am God, thi God. ⁹ I schal not repreue thee in thi sacrifices; and thi brent sacrifices ben euere bifor me. ¹⁰ I schal not take calues of thin hows; nethir geet buckis of thi flockis.