Psalms 65

¹ I haue knowe alle the volatils of heuene; and the fairnesse of the feeld is with me. ² If Y schal be hungry, Y schal not seie to thee; for the world and the fulnesse therof is myn. ³ Whether Y schal eete the fleischis of boolis? ethir schal Y drynke the blood of geet buckis? ⁴ Offre thou to God the sacrifice of heriyng; and yelde thin avowis to the hiyeste God. ⁵ And inwardli clepe thou me in the dai of tribulacioun; and Y schal delyuere thee, and thou schalt onoure me. ⁶ But God seide to the synnere, Whi tellist thou out my riytfulnessis; and takist my testament bi thi mouth? ⁷ Sotheli thou hatidist lore; and hast cast awey my wordis bihynde. ⁸ If thou siyest a theef, thou `hast runne with hym; and thou settidist thi part with avowtreris. ⁹ Thi mouth was plenteuouse of malice; and thi tunge medlide togidere giles. ¹⁰ Thou sittynge spakist ayens thi brother, and thou settidist sclaundir ayens the sone of thi modir; ¹¹ thou didist these thingis, and Y was stille. Thou gessidist wickidli, that Y schal be lijk thee; Y schal repreue thee, and Y schal sette ayens thi face. ¹² Ye that foryeten God, vndurstonde these thingis; lest sum tyme he rauysche, and noon be that schal delyuere. ¹³ The sacrifice of heriyng schal onoure me; and there is the weie, where ynne Y schal schewe to hym the helthe of God.