Psalms 68

¹ Iust men schulen se, and schulen drede; and thei schulen leiye on hym, and thei schulen seie, Lo! ² the man that settide not God his helpere. But he hopide in the multitude of his richessis; and hadde maistrie in his vanite. ³ Forsothe Y, as a fruytful olyue tre in the hous of God; hopide in the merci of God with outen ende, and in to the world of world. ⁴ Y schal knowleche to thee in to the world, for thou hast do mercy to me; and Y schal abide thi name, for it is good in the siyt of thi seyntis. ⁶ The title of the two and fiftithe salm. To the ouercomer bi the quere, the lernyng of Dauid. The vnwise man seide in his herte; God is not. ⁷ Thei ben corrupt, and maad abhomynable in her wickidnessis; noon is that doith good. 8 God bihelde fro heuene on the sones of men; that he se, if ony is vndurstondynge, ether sekynge God. ⁹ Alle boweden awei, thei ben maad vnprofitable togidre; noon is that doith good, ther is not til to oon. ¹⁰ Whether alle men, that worchen wickidnesse, schulen not wite; whiche deuouren my puple as the mete of breed? ¹¹ Thei clepiden not God; there thei trembliden for drede, where no drede was. For God hath scaterid the boones of hem, that plesen men; thei ben schent, for God hath forsake hem. ¹² Who schal yyue fro Syon helthe to Israel? whanne the Lord hath turned the caitifte of his puple, Jacob schal ful out make ioie, and Israel schal be glad. 14 The title of the thre and fiftithe salm. To victorie in orguns, ether in salmes, the lernyng of Dauid, 15 whanne Zyfeys camen, and seiden to Saul, Whethir Dauid is not hid at vs? ¹⁶ God, in thi name make thou me saaf; and in thi vertu deme thou me. ¹⁷ God, here thou my preier; with eeris perseyue thou the wordis of my mouth. ¹⁸ For aliens han rise ayens me, and stronge men souyten my lijf; and thei settiden not God bifor her siyt. ¹⁹ For, lo! God helpith me; and the Lord is vptaker of my soule. ²⁰ Turne thou awei yuelis to myn enemyes; and leese thou hem in thi treuthe. ²¹ Wilfuli Y schal make sacrifice to thee; and, Lord, Y schal knouleche to thi name, for it is good. ²² For thou delyueridist me fro al tribulacioun; and myn iye dispiside on myn enemyes. ²⁴ The title of the foure and fiftithe salm. In Ebreu thus, To victorie in orguns, the lernyng of Dauid. In Jeroms translacioun thus, To the ouercomer in salmes of Dauid lernid. ²⁵ God, here thou my preier, and dispise thou not my biseching; ²⁶ yyue thou tent to me, and here thou me. I am sorewful in myn exercising; and Y am disturblid of the face of the enemye, ²⁷ and of the tribulacioun of the synner. For thei bowiden wickidnessis in to me; and in ire thei weren diseseful to me. ²⁸ Myn herte was disturblid in me; and the drede of deth felde on me. ²⁹ Drede and trembling camen on me; and derknessis hiliden me. ³⁰ And Y seide, Who schal yyue to me fetheris, as of a culuer; and Y schal fle, and schal take rest? ³¹ Lo! Y yede fer awei, and fledde; and Y dwellide in wildirnesse. ³² I abood hym, that made me saaf fro the litilnesse, `ether drede, of spirit; and fro tempest. ³³ Lord, caste thou doun, departe thou the tungis of hem; for Y siy wickidnesse and ayenseiyng in the citee. ³⁴ Bi dai and nyyt wickidnesse schal cumpasse it on the wallis therof; ³⁵ and trauel and vnriytfulnesse ben in the myddis therof. And vsure and gile failide not; fro the stretis therof.