Psalms 7

¹ Who let go the wielde asse fre, and who loside the boondis of hym? ² To whom Y haue youe an hows in wildirnesse, and the tabernacles of hym in the lond of saltnesse. ³ He dispisith the multitude of citee; he herith not the cry of an axere. ⁴ He lokith aboute the hillis of his lesewe, and he sekith alle greene thingis. ⁵ Whether an vnycorn schal wilne serue thee, ethir schal dwelle at thi cratche? ⁶ Whether thou schalt bynde the vnicorn with thi chayne, for to ere, ethir schal he breke the clottis of valeis aftir thee? ⁷ Whether thou schalt haue trist in his grete strengthe, and schalt thou leeue to hym thi traueils? ⁸ Whether thou schalt bileue to hym, that he schal yelde seed to thee, and schal gadere togidere thi cornfloor? ⁹ The fethere of an ostriche is lijk the fetheris of a gerfawcun, and of an hauk; ¹⁰ which ostrige forsakith hise eirun in the erthe, in hap thou schalt make tho hoot in the dust. ¹¹ He foryetith, that a foot tredith tho, ethir that a beeste of the feeld al tobrekith tho. ¹² He is maad hard to hise briddis, as if thei ben not hise; he traueilide in veyn, while no drede constreynede. ¹³ For God hath priued hym fro wisdom, and yaf not vnderstondyng to hym. 14 Whanne tyme is, he reisith the wengis an hiy; he scorneth the hors, and his ridere. 15 Whether thou schalt yyue strengthe to an hors, ether schal yyue neiyng aboute his necke? ¹⁶ Whether thou schalt reyse hym as locustis? The glorie of hise nosethirlis is drede. ¹⁷ He diggith erthe with the foot, he `fulli ioieth booldli; he goith ayens armed men.