Psalms 73

¹ Thou laddest me forth, for thou art maad myn hope; a tour of strengthe fro the face of the enemye. ² I schal dwelle in thi tabernacle in to worldis; Y schal be keuered in the hilyng of thi wengis. ³ For thou, my God, hast herd my preier; thou hast youe eritage to hem that dreden thi name. ⁴ Thou schalt adde daies on the daies of the king; hise yeeris til in to the dai of generacioun and of generacioun. ⁵ He dwellith with outen ende in the siyt of God; who schal seke the merci and treuthe of hym? ⁶ So Y schal seie salm to thi name in to the world of world; that Y yelde my vowis fro dai in to dai. ⁸ The titil of the oon and sixtithe salm. To the victorie on Iditum, the salm of Dauid. ⁹ Whether my soule schal not be suget to God; for myn heelthe is of hym. ¹⁰ For whi he is bothe my God, and myn heelthe; my taker vp, Y schal no more be moued. 11 Hou longe fallen ye on a man? alle ye sleen; as to a wal bowid, and a wal of stoon with out morter cast doun. 12 Netheles thei thouyten to putte awei my prijs, Y ran in thirst; with her mouth thei blessiden, and in her herte thei cursiden. 13 Netheles, my soule, be thou suget to God; for my pacience is of hym. 14 For he is my God, and my saueour; myn helpere, Y schal not passe out. 15 Myn helthe, and my glorie is in God; God is the yyuer of myn help, and myn hope is in God. 16 Al the gaderyng togidere of the puple, hope ye in God, schede ye out youre hertis bifore hym; God is oure helpere with outen ende. 17 Netheles the sones of men ben veyne; the sones of men ben liers in balauncis, that thei disseyue of vanytee in to the same thing. 18 Nile ye haue hope in wickidnesse, and nyle ye coueyte raueyns; if ritchessis be plenteuouse, nyle ye sette the herte therto. 19 God spak onys, Y herde these twei thingis, that power is of God, and, thou Lord, mercy is to thee; 20 for thou schalt yelde to ech man bi hise werkis. 22 The titil of the two and sixtithe salm. The salm of Dauid, `whanne he was in the desert of Judee. ²³ God, my God, Y wake to thee ful eerli. Mi soule thirstide to thee; my fleisch thirstide to thee ful many foold. ²⁴ In a lond forsakun with out wei, and with out water, so Y apperide to thee in hooli; that Y schulde se thi vertu, and thi glorie. ²⁵ For thi merci is betere than lyues; my lippis schulen herie thee. ²⁶ So Y schal blesse thee in my lijf; and in thi name Y schal reise myn hondis. ²⁷ Mi soule be fillid as with inner fatnesse and vttermere fatnesse; and my mouth schal herie with lippis of ful out ioiyng. ²⁸ So Y hadde mynde on thee on my bed, in morewtidis Y shal thenke of thee;