Psalms 79

¹ Forsothe Y am a nedi man, and pore; God, helpe thou me. Thou art myn helper and my delyuerere; Lord, tarye thou not. ³ The seuentithe salm hath no title. Lord, Y hopide in thee, be Y not schent with outen ende; ⁴ in thi riytwisnesse delyuere thou me, and rauysche me out. Bowe doun thin eere to me; and make me saaf. ⁵ Be thou to me in to God a defendere; and in to a strengthid place, that thou make me saaf. For thou art my stidefastnesse; and my refuit. ⁶ My God, delyuere thou me fro the hoond of the synner; and fro the hoond of a man doynge ayens the lawe, and of the wickid man. ⁷ For thou, Lord, art my pacience; Lord, thou art myn hope fro my yongthe. ⁸ In thee Y am confermyd fro the wombe; thou art my defendere fro the wombe of my modir. ⁹ My syngyng is euere in thee; Y am maad as a greet wonder to many men; and thou art a strong helpere. ¹⁰ My mouth be fillid with heriyng; that Y synge thi glorie, al dai thi greetnesse. ¹¹ Caste thou not awei me in the tyme of eldnesse; whanne my vertu failith, forsake thou not me. ¹² For myn enemyes seiden of me; and thei that kepten my lijf maden counsel togidere. ¹³ Seiynge, God hath forsake hym; pursue ye, and take hym; for noon is that schal delyuere.