Psalms 86

¹ Nyle ye reise an hiy youre horn; nyle ye speke wickidnesse ayens God. ² For nether fro the eest, nethir fro the west, nethir fro desert hillis; for God is the iuge. ³ He mekith this man, and enhaunsith hym; for a cuppe of cleene wyn ful of meddling is in the hoond of the Lord. ⁴ And he bowide of this in to that; netheles the drast therof is not anyntischid; alle synneris of erthe schulen drinke therof. ⁵ Forsothe Y schal telle in to the world; Y schal synge to God of Jacob. ⁶ And Y schal breke alle the hornes of synneris; and the hornes of the iust man schulen be enhaunsid. ⁸ The title of the fyue and seuentithe salm. To the victorie in orguns, `the salm of the song of Asaph. ⁹ God is knowun in Judee; his name is greet in Israel. ¹⁰ And his place is maad in pees; and his dwellyng is in Syon. ¹¹ Ther he brak poweris; bowe, scheeld, swerd, and batel. ¹² And thou, God, liytnest wondirfuli fro euerlastynge hillis; ¹³ alle vnwise men of herte weren troblid. Thei slepten her sleep; and alle men founden no thing of richessis in her hondis. ¹⁴ Thei that stieden on horsis; slepten for thi blamyng, thou God of Jacob. ¹⁵ Thou art feerful, and who schal ayenstonde thee? fro that tyme thin ire. ¹⁶ Fro heuene thou madist doom herd; the erthe tremblide, and restide. ¹⁷ Whanne God roos vp in to doom; to make saaf al the mylde men of erthe.