Psalms 89

¹ Hou grete thingis han we herd, aud we han knowe tho; and oure fadris. telden to vs. ² Tho ben not hid fro the sones of hem; in anothir generacioun. And thei telden the heriyngis of the Lord, and the vertues of hym; and hise merueilis, whyche he dide. ³ And he reiside witnessyng in Jacob; and he settide lawe in Israel. Hou grete thingis comaundide he to oure fadris, to make tho knowun to her sones; ⁴ that another generacioun knowe. Sones, that schulen be born, and schulen rise vp; schulen telle out to her sones. ⁵ That thei sette her hope in God, and foryete not the werkis of God; and that thei seke hise comaundementis. ⁶ Lest thei be maad a schrewid generacioun; and terrynge to wraththe, as the fadris of hem. A generacioun that dresside not his herte; and his spirit was not bileued with God. ⁷ The sones of Effraym, bendinge a bouwe and sendynge arowis; weren turned in the dai of batel. ⁸ Thei kepten not the testament of God; and thei nolden go in his lawe. ⁹ And thei foryaten hise benefices; and hise merueils, whiche he schewide to hem. ¹⁰ He dide merueils bifore the fadris of hem in the loond of Egipt; in the feeld of Taphneos. ¹¹ He brak the see, and ledde hem thorou; and he ordeynede the watris as in a bouge. ¹² And he ledde hem forth in a cloude of the dai; and al niyt in the liytnyng of fier. ¹³ He brak a stoon in deseert; and he yaf watir to hem as in a myche depthe. ¹⁴ And he ledde watir out of the stoon; and he ledde forth watris as floodis. ¹⁵ And thei leiden to yit to do synne ayens hym; thei excitiden hiye God in to ire, in a place with out water. 16 And thei temptiden God in her hertis; that thei axiden meetis to her lyues. 17 And thei spaken yuel of God; thei seiden, Whether God may make redi a bord in desert? 18 For he smoot a stoon, and watris flowiden; and streemys yeden out in aboundaunce. Whether also he may yyue breed; ether make redi a bord to his puple? 19 Therfor the Lord herde, and delaiede; and fier was kindelid in Jacob, and the ire of God stiede on Israel. 20 For thei bileueden not in God; nether hopiden in his heelthe. 21 And he comaundide to the cloudis aboue; and he openyde the yatis of heuene. 22 And he reynede to hem manna for to eete; and he yaf to hem breed of heuene. 23 Man eet the breed of aungels; he sent to hem meetis in aboundance. 24 He turnede ouere the south wynde fro heuene; and he brouyte in bi his vertu the weste wynde. 25 And he reynede fleischis as dust on hem; and he reinede volatils fethered, as the grauel of the see. ²⁶ And tho felden doun in the myddis of her castels; aboute the tabernaclis of hem. ²⁷ And thei eeten, and weren fillid greetli, and he brouyte her desire to hem; ²⁸ thei weren not defraudid of her desier. Yit her metis weren in her mouth; ²⁹ and the ire of God stiede on hem. And he killide the fatte men of hem; and he lettide the chosene men of Israel. ³⁰ In alle these thingis thei synneden yit; and bileuede not in the merueils of God. ³¹ And the daies of hem failiden in vanytee; and the yeeris of hem faileden with haste. ³² Whanne he killide hem, thei souyten hym; and turneden ayen, and eerli thei camen to hym. ³³ And thei bithouyten, that God is the helper of hem; and `the hiy God is the ayenbier of hem. ³⁴ And thei loueden hym in her mouth; and with her tunge thei lieden to hym. ³⁵ Forsothe the herte of hem was not riytful with hym; nethir thei weren had feithful in his testament. ³⁶ But he is merciful, and he schal be maad merciful to the synnes of hem; and he schal not destrie hem. And he dide greetli, to turne awei his yre; and he kyndelide not al his ire. ³⁷ And he bithouyte, that thei ben fleische; a spirit goynge, and not turnynge ayen. ³⁸ Hou oft maden thei hym wrooth in desert; thei stireden hym in to ire in a place with out watir. ³⁹ And thei weren turned, and temptiden God; and thei wraththiden the hooli of Israel. ⁴⁰ Thei bithouyten not on his hond; in the dai in the which he ayen bouyte hem fro the hond of the trobler. ⁴¹ As he settide hise signes in Egipt; and hise grete wondris in the feeld of Taphneos. ⁴² And he turnede the flodis of hem and the reynes of hem in to blood; that thei schulden not drynke. ⁴³ He sente a fleisch flie in to hem, and it eet hem; and he sente a paddok, and it loste hem. ⁴⁴ And he yaf the fruytis of hem to rust; and he yaf the trauels of hem to locustis. ⁴⁵ And he killide the vynes of hem bi hail; and the moore trees of hem bi a frost. ⁴⁶ And he bitook the beestis of hem to hail; and the possessioun of hem to fier. ⁴⁷ He sente in to hem the ire of his indignacioun; indignacioun, and ire, and tribulacioun, sendingis in bi iuel aungels. ⁴⁸ He made weie to the path of his ire, and he sparide not fro the deth of her lyues; and he closide togidere in deth the beestis of hem. ⁴⁹ And he smoot al the first gendrid thing in the lond of Egipt; the first fruytis of alle the trauel of hem in the tabernaclis of Cham. ⁵⁰ And he took awei his puple as scheep; and he ledde hem forth as a flok in desert. ⁵¹ And he ledde hem forth in hope, and thei dredden not; and the see hilide the enemyes of hem. ⁵² And he brouyte hem in to the hil of his halewyng; in to the hil which his riythond gat. And he castide out hethene men fro the face of hem; and bi lot he departide to hem the lond in a cord of delyng.