Psalms 90

¹ And thei temptiden, and wraththiden heiy God; and thei kepten not hise witnessyngis. ² And thei turneden awei hem silf, and thei kepten not couenaunt; as her fadris weren turned in to a schrewid bouwe. ³ Thei stiriden him in to ire in her litle hillis; and thei terriden hym to indignacioun of her grauen ymagis. ⁴ God herde, and forsook; and brouyte to nouyt Israel greetli. ⁵ And he puttide awei the tabernacle of Sylo; his tabernacle where he dwellide among men. ⁶ And he bitook the vertu of hem in to caitiftee; and the fairnesse of hem in to the hondis of the enemye. ⁷ And he closide togidere his puple in swerd; and he dispiside his erytage. ⁸ Fier eet the yonge men of hem; and the virgyns of hem weren not biweilid. ⁹ The prestis of hem fellen doun bi swerd; and the widewis of hem weren not biwept. ¹⁰ And the Lord was reisid, as slepynge; as miyti greetli fillid of wiyn. ¹¹ And he smoot hise enemyes on the hynderere partis; he yaf to hem euerlastyng schenschipe. ¹² And he puttide awei the tabernacle of Joseph; and he chees not the lynage of Effraym. ¹³ But he chees the lynage of Juda; he chees the hil of Syon, which he louede. ¹⁴ And he as an vnicorn bildide his hooli place; in the lond, which he foundide in to worldis. ¹⁵ And he chees Dauid his seruaunt, and took hym vp fro the flockis of scheep; he took hym fro bihynde scheep with lambren. ¹⁶ To feed Jacob his seruaunt; and Israel his eritage. ¹⁷ And he fedde hem in the innocens of his herte; and he ledde hem forth in the vndurstondyngis of his hondis.