Psalms 92

¹ God of vertues, turne thou vs; and schewe thi face, and we schulen be saaf. ² Lord God of vertues; hou longe schalt thou be wrooth on the preier of thi seruaunt? ³ Hou longe schalt thou feede vs with the breed of teeris; and schalt yyue drynke to vs with teeris in mesure? ⁴ Thou hast set vs in to ayenseiyng to oure neiyboris; and oure enemyes han scornyde vs. ⁵ God of vertues, turne thou vs; and schewe thi face, and we schulen be saaf. ⁶ Thou translatidist a vyne fro Egipt; thou castidist out hethene men, and plauntidist it. ⁷ Thou were leeder of the weie in the siyt therof; and thou plauntidist the rootis therof, and it fillide the lond. ⁸ The schadewe therof hilide hillis; and the braunchis therof filliden the cedris of God. ⁹ It streiyte forth hise siouns til to the see, and the generacioun ther of `til to the flood. ¹⁰ Whi hast thou destried the wal therof; and alle men that goen forth bi the weie gaderiden awei the grapis therof? ¹¹ A boor of the wode distriede it; and a singuler wielde beeste deuouride it. ¹² God of vertues, be thou turned; biholde thou fro heuene, and se, and visite this vyne. ¹³ And make thou it perfit, which thi riythond plauntide; and biholde thou on the sone of man, which thou hast confermyd to thee. ¹⁴ Thingis brent with fier, and vndurmyned; schulen perische for the blamyng of thi cheer. ¹⁵ Thin hond be maad on the man of thi riythond; and on the sone of man, whom thou hast confermed to thee.