Psalms 99

¹ Kepe thou my lijf, for Y am holi; my God, make thou saaf thi seruaunt hopynge in thee. ² Lord, haue thou merci on me, for Y criede al day to thee; ³ make thou glad the soule of thi seruaunt, for whi, Lord, Y haue reisid my soule to thee. ⁴ For thou, Lord, art swete and mylde; and of myche merci to alle men inwardli clepynge thee. ⁵ Lord, perseyue thou my preier with eeris; and yyue thou tente to the vois of my bisechyng. ⁶ In the dai of my tribulacioun Y criede to thee; for thou herdist me. ⁷ Lord, noon among goddis is lijk thee; and noon is euene to thi werkis. ⁸ Lord, alle folkis, whiche euere thou madist, schulen come, and worschipe bifore thee; and thei schulen glorifie thi name. ⁹ For thou art ful greet, and makinge merueils; thou art God aloone.