Sirach 35

¹ And Y rootid in a puple onourid; and the eritage therof in to the partis of my God, and my witholding in the plentee of seyntis. ² Y was enhaunsid as a cedre in Liban, and as a cipresse tree in the hil of Syon. ³ Y was enhaunsid as a palm tree in Cades, and as the plauntyng of roose in Jeryco. ⁴ As a fair olyue tree in feeldis; and Y was enhaunsid as a plane tree bisidis watir in stretis. ⁵ As canel and bawme yyuynge greet smelle, Y yaf odour; as chosun myrre Y yaf the swetnesse of odour. ⁶ And as storax, and galban, and vngula, and gumme, and as Liban not kit doun, Y made hoot my dwellyng place; and myn odour as bawme not meddlid. ⁷ Y as a terebynte stretchide forth my boowis; and my boowis ben boowis of onour, and of glorie. ⁸ Y as a vyne made fruyt the swetnesse of odour; and my flouris ben the fruytis of onour, and of oneste. ⁹ I am a modir of fair loue, and of drede, and of knowyng, and of hooli hope. ¹⁰ In me is al grace of weie, and of treuthe; in me is al hope of lijf and of vertu. ¹¹ Alle ye that coueiten me, passe to me; and be ye fillid of my generaciouns. ¹² For whi my spirit is swete aboue hony; and myn eritage is aboue hony, and hony comb. ¹³ My mynde is in the generacioun of worldis. ¹⁴ Thei that eten me, schulen hungre yit; and thei that drynken me, schulen thirste yit. ¹⁵ He that herith me, shal not be schent; and thei that worchen in me, schulen not do synne; and thei that declaren me, ¹⁶ schulen haue euere lastynge lijf. ¹⁷ Alle these thingis is the book of lijf, and the testament of the hiyeste, and the knowyng of treuthe. ¹⁸ Moises comaundide a lawe in the comaundementis of riytfulnessis, and eritage to the hous of Jacob, and biheestis to Israel. ¹⁹ He settide to Dauid, his child, to reise of hym a kyng moost strong, and sittynge with outen ende in the trone of onour. ²⁰ Which kyng fillith wisdom, as Phison schedith out watir; and as Tigris in the daies of newe thingis. ²¹ Which, as Eufrates, fillith wit; which multiplieth, as Jordan in the tyme of heruest. ²² Which sendith techyng as liyt; and is niy alle men, as Gion in the dai of vendage. ²³ Which makith perfitli first to knowe that wisdom; and a feblere man schal not enserche it. ²⁴ For whi the thouyt therof schal be plenteuouse of the see; and his counsel in the greet occian. ²⁵ Y wisdom schedde out floodis; ²⁶ Y as a weie of ful greet watir of the flood. Y as the flood Dorix, and as a watir cundit Y yede out of paradis.