Tobit 10

¹ Therfor Tobie bithouyte of the wordis of the aungel, and brouyte forth of his scrippe a part of the mawe, and puttide it on quike coolis. 2 Thanne Raphael, the aungel, took the fend, and boond hym in the desert of hiyere Egipte. 3 Thanne Tobie monestide the virgyn, and seide to hir, Sare, rise vp, and preye we God to dai, and to morewe, and the secounde morewe; for in these thre nyytis we ben ioyned to God; sotheli whanne the thridde nyyt is passid, we schulen be in oure mariage; ⁴ for we ben the children of hooli men, and we moun not so be ioyned togidere as also hethene men, that knowen not God. ⁵ Sotheli thei risiden togidere, and bothe preyeden togidere bisili, that helthe schulde be youun to hem. ⁶ And Tobie seide, Lord God of oure fadris, heuenes, and londis, and the see, and wellis, and floodis, and ech creature of thin, which is in tho, blesse thee; thou madist Adam of the sliym of erthe, ⁷ and yauest to hym an help, Eue. ⁸ And now, Lord, thou woost, that Y take my sistir not for cause of letcherie, but for loue aloone of eeris, in whiche thi name be blessid in to worldis of worldis. ⁹ Therfor Sare seide, Lord, haue thou mercy on vs, haue thou merci on vs, and waxe we bothe eelde togidere hoole. ¹⁰ And it was doon aboute the cockis crowyng, Raguel made hise seruauntis to be clepid, and thei yeden with hym to digge a sepulcre. 11 For he dredde, lest it bifelde in lijk maner to hym, that bifelde also to seuene othere men, that entriden to hir. ¹² And whanne thei hadden maad redi a pit, Raguel yede ayen to his wijf, and seide to hir, ¹³ Sende oon of thin handmaydis, and se sche, whether `he is deed, that Y byrie hym, bifor that the liyt come.