Tobit 12

¹ and blessing be seid on thi wijf, and on youre fadris and modris, ² and se ye youre sones, and the sones of youre sones, til in to the thridde and the fourthe generacioun; and youre seed be blessid of God of Israel, that regneth in to the worldis of worldis. 3 And whanne alle men hadden seid Amen, thei yeden to the feeste; but also thei vsiden the feeste of weddyngis with the drede of the Lord. ⁵ Sotheli whanne Tobie made tariyngis for the cause of weddyngis, Tobie his fadir was angwisched, seiynge, Gessist thou, whi my sone tarieth, ethir whi he is witholdun there? 6 Gessist thou, whether Gabelus is deed, and no man yeldith to hym the monei? 7 Forsothe he bigan to be sorie ful myche, and Anne, his wijf, with hym; and bothe bigunnen to wepe togidere, for her sone turnede not ayen to hem in the dai set. ⁸ Therfor his modir wepte with teeris withouten remedie, and seide, Alas to me! my sone, whi senten we thee a pilgrimage, the liyt of oure iyen, the staf of oure eelde, the solace of oure lijf, the hope of oure eiris? ⁹ We hadden alle thingis togidere in thee oon, and ouyte not leete thee go fro vs. ¹⁰ To whom Tobie seide, Be stille, and nyle thou be troblid; oure sone is hool; thilke man is feithful ynow, with whom we senten hym. ¹¹ Forsothe sche myyte not be coumfortid in ony maner, but ech dai sche skippide forthe, and lokide aboute, and cumpasside alle the weies, bi whiche the hope of comyng ayen was seyn, to se hym comynge afer, if it myyte be doon. ¹² And sotheli Raguel seide to the hosebonde of his douytir, Dwelle thou here, and Y schal sende a messanger of helthe of thee to Tobie, thi fadir. ¹³ To whom Tobie seide, Y knowe, that my fadir and my modir rekynen now the daies, and her spirit is turmentid in hem. ¹⁴ And whanne Raguel preiede Tobie with many wordis, and he nolde here Raguel bi ony resoun, Raguel bitook to hym Sare, and half the part of al his catel, in children and damysels, in the scheep and camels, and in kiyn, and in myche monei; and he delyueride fro hym silf Tobie saaf and ioiynge, ¹⁵ and seide, The hooli aungel of the Lord be in youre weie, and brynge you sounde, and fynde ye alle thingis riytfuli aboute youre fadir and modir, ¹⁶ and myn iyen se youre sones, bifor that Y die. And the fadir and modir token her douyter, and kissiden hir, 17 and leeten hir go, and monestiden hir to onour the fader and modir of hir hosebonde, to loue the hosebonde, to reule the meynee, to gouerne the hows, and to schewe hir self vnrepreuable. 19 And whanne thei turneden ayen, thei camen to Carram, which is in the myddil of the weie ayens Nynyue, `in the eleuenthe dai. ²⁰ And the aungel seide, Tobie brother, thou woost, hou thou leftist thi fadir. ²¹ Therfor if it plesith thee, go we bifore; and the meineis, with thi wijf togidere and with the beestis, sue oure weie with soft goynge. ²² And whanne this pleside, that thei schulden go, Raphael seide to Tobie, Take with thee of the galle of the fisch, for it schal be nedeful. Therfor Tobie took of that galle, and thei yeden forth.