Wisdom 10

² Douytir of the prince, thi goyngis ben ful faire in schoon; the ioyncturis of thi heppis ben as brochis, that ben maad bi the hond of a crafti man. ³ Thi nawle is as a round cuppe, and wel formed, that hath neuere nede to drynkis; thi wombe is as an heep of whete, biset aboute with lilies. ⁴ Thi twei teetis ben as twei kidis, twynnes of a capret. ⁵ Thi necke is as a tour of yuer; thin iyen ben as cisternes in Esebon, that ben in the yate of the douyter of multitude; thi nose is as the tour of Liban, that biholdith ayens Damask. ⁶ Thin heed is as Carmele; and the heeres of thin heed ben as the kyngis purpur, ioyned to trowyis. ⁷ Dereworthe spousesse, thou art ful fair, and ful schappli in delices. ⁸ Thi stature is licned to a palm tree, and thi tetis to clustris of grapis. ⁹ I seide, Y schal stie in to a palm tree, and Y schal take the fruytis therof. And thi tetis schulen be as the clustris of grapis of a vyner; and the odour of thi mouth as the odour of pumgranatis; ¹⁰ thi throte schal be as beste wyn. Worthi to my derlyng for to drynke, and to hise lippis and teeth to chewe. ¹¹ Y schal cleue by loue to my derlyng, and his turnyng schal be to me. ¹² Come thou, my derlyng, go we out in to the feeld; dwelle we togidere in townes. ¹³ Ryse we eerli to the vyner; se we, if the vyner hath flourid, if the flouris bryngen forth fruytis, if pumgranatis han flourid; there I schal yyue to thee my tetis. ¹⁴ Mandrogoris han youe her odour in oure yatis; my derlyng, Y haue kept to thee alle applis, new and elde. ¹⁶ Who `mai grante to me thee, my brother, soukynge the tetis of my modir, that Y fynde thee aloone without forth, and that Y kisse thee, and no man dispise me thanne? ¹⁷ Y schal take thee, and Y schal lede thee in to the hous of my modir, and in to the closet of my modir; there thou schalt teche me, and Y schal yyue to thee drink of wyn maad swete, and of the must of my pumgranatis. ¹⁸ His lefthond vndur myn heed, and his riythond schal biclippe me. ¹⁹ Ye douytris of Jerusalem, Y charge you greetli, that ye reise not, nether make the dereworthe spousesse to awake, til sche wole. ²⁰ Who is this spousesse, that stieth fro desert, and flowith in delices, and restith on hir derlynge? Y reiside thee vndur a pumgranate tre; there thi modir was corrupt, there thi modir was defoulid. ²¹ Set thou me as a signet on thin herte, as a signet on thin arm; for loue is strong as deth, enuy is hard as helle; the laumpis therof ben laumpis of fier, and of flawmes.